Davao del Norte – Tinatayang Php697,000 halaga ng hinihinalang shabu ang nasabat sa isinagawang buy-bust operation ng PNP sa Barangay Mankilam, Tagum City, Davao del Norte, nito lamang Oktubre 17, 2022.
Kinilala ni PLtCol Jay Dema-Ala, Acting Chief of Police ng Tagum City Police Station, ang suspek na si alyas “Russel” 45, residente ng Poblacion Maco, Davao De Oro na tinaguriang High Value Individual ng lugar.
Ayon kay PLtCol Dema-Ala, naaresto ang suspek ng pinagsamang tauhan ng Tagum CPS at Provincial Intelligence Unit kasama ang Police Drug Enforcement Unit at 1st Davao Norte Provincial Mobile Force Company katuwang ang Regional Mobile Force Battalion 11.
Dagdag pa ni PLtCol Dema-Ala, nakuha mula sa suspek ang ilang pakete ng hinihinalang shabu na may bigat na humigit kumulang 102.5 gramo na may street market value na Php697,000 at marked money na ginamit sa operasyon.
Ang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Ang pagkakadakip sa suspek ay maglalapit sa layunin ng Police Regional Office 11 na gawing drug-free ang rehiyon onse at sa malasakit na ipinapakita ng mga mamamayan sa kapulisan ay makakamit ang kaayusan at kapayapaan tungo sa kaunlaran ng bansa.
Panulat ni Patrolman Alfred Vergara
