Antipolo City, Rizal – Tinatayang Php1,320,000 na halaga ng marijuana bricks ang nasabat sa isang High Value Individual (HVI) sa ikinasang buy-bust operation ng PNP-PDEA sa Grand Heights Road, Brgy. San Roque, Antipolo City, Rizal nito lamang Huwebes, Oktubre 13, 2022.
Kinilala ni Police Brigadier General Jose Melencio Nartatez Jr, Regional Director ng Police Regional Office 4A, ang suspek na si Maria Victoria Perito, HVI.
Ayon kay PBGen Nartatez Jr., bandang 10:45 ng gabi naaresto ang suspek sa pinagsanib na puwersa ng Regional PNP Drug Enforcement Unit 4A, Antipolo City Police Station, Rizal Police Provincial Office, PNP Drug Enforcement Group- Special Operations Units 4A at Philippine Drug Enforcement Agency 4A.
Narekober sa suspek ang 11 pirasong transparent plastic sachets ng tuyong dahon ng hinihinalang marijuana bricks na may timbang na 11 kilogramo at tinatayang nagkakahalaga ng Php1,320,000, isang tunay na Php1,000 bill at 24 pirasong pekeng Php1,000 bill bilang buy-bust money, isang Php1,000 bill bilang recovered money, isang wallet, dalawang eco bag, at isang cellphone.
Nahaharap ang suspek sa kasong paglabag sa Sections 5 at 11, Article II ng Republic Act 9165 o Comprehensive Dangerous Drugs Act of 2002.
Ang tagumpay ng operasyon ay bunga ng patuloy na pagpapaigting ng PNP sa kampanya kontra ilegal na droga at mga kriminalidad at hikayatin ang mga mamamayan na makiisa at makipagtulungan sa pagkamit ng katahimikan at pag-unlad ng buong rehiyon.
Source: Police Regional Office 4A
Panulat ni Police Staff Sergeant Donabel Dulin
