Camp Gen Martin Teofilo Delgado – Kasabay ng pagdaraos ng Traditional Flag Raising Ceremony sa Police Regional Office 6 nitong Lunes ika-10 ng Oktubre 2022, matagumpay na inilunsad ang Revitalized PNP KASIMBAYANAN sa PRO6 Grandstand, Camp Gen Martin Teofilo Delgado, Iloilo City.
Ang naturang aktibidad ay pinangunahan ni PRO6 Deputy Regional Director for Administration, Police Brigadier General Archival Macala sa ilalim ng pamumuno ni Police Brigadier General Leo M Francisco, Regional Director PRO6 kasama ang Command Group, Regional Staff, mga kinatawan ng DILG 6, Advocacy Support Group, Faith-Based Organization, Force Multipliers, at iba pang sektor ng pamahalaan.
Ang Revitalized PNP KASIMBAYANAN ay isang programa na binubuo ng nagkakaisa at nagtutulungang Kapulisan, Simbahan at Pamayanan na naglalayong pagyamanin at suportahan ang kasalukuyang PNP peace and security framework na M+K+K=K o ang Malasakit, Kaayusan, Kapayapaan tungo sa Kaunlaran.
Sa mensahe na ipinahiwatig ni Dir. Juan Juvian E Ingeniero, Regional Director ng DILG 6, CESO IV, sa pamamagitan ng kanyang Assistant Regional Director, Ms Maria Calpiza J Sardua, CESO IV, na siyang nagsilbing panauhing pandangal at tagapagsalita ng naturang aktibidad, kanyang binigyang diin ang kahalagahan ng pakikiisa ng mga lider ng mga Religious Sectors at ng komunidad sa pagkakaroon ng isang ligtas at maunlad na lipunan at sa pagpapanatili ng kapayapaan at kaayusan.
Naging tampok sa naturang aktibidad ang paglagda ng lahat ng dumalo at naging bahagi sa makabuluhang gawain ng pledge of commitment na sinundan ng pinning ng KASIMBAYANAN pin buttons.
Samantala, ipinahayag at ipinangako naman ng mga kinatawan ng iba’t ibang sektor ng rehiyon ang kanilang pakikiisa at ang buong suporta para sa maayos at tagumpay na pagsasakatuparan ng programa.
