Talisay City, Cebu – Tinatayang nasa Php748,000 halaga ng hinihinalang shabu ang nasabat sa naarestong High Value Individual (HVI) sa buy-bust operation ng Cebu PNP sa Barangay Dumlog, Talisay City, Cebu noong Sabado, ika-8 ng Oktubre 2022.
Kinilala ni Police Lieutenant Colonel Randy T Caballes, Hepe ng Talisay City Police Station, Cebu Police Provincial Office (CPPO), ang naaresto na si Raymund J Camacho, 33, residente ng Phase 2, Deca Homes, Dumlog, Talisay City, Cebu.
Ayon kay Police Lieutenant Colonel Caballes, si Camacho ay kabilang sa talaan ng HVI, Regional Level.
Ayon pa kay PLtCol Caballes, naaresto ang suspek bandang 9:30 ng gabi ng mga operatiba ng Talisay CPS sa koordinasyon sa PDEA 7.
Dagdag pa ni Police Lieutenant Caballes, kabilang sa mga nakuha sa suspek ay ang nasa 110 gramo ng umano’y shabu na may Standard Drug Price na Php748,000, isang .45 calibre pistol, limang piraso ng live ammunition, at buy-bust money.
Si Camacho ay nahaharap sa kasong paglabag sa Section 5 at 11, Article II ng RA 9165 o ang Comprehensive Dangerous Drugs Act of 2002 at kasong RA 10591 o ang Comprehensive Firearms and Ammunition Regulation Act.
Siniguro naman ng Talisay City Police Office na kanila pang paiigtingin at pag-iibayuhin ang kanilang kampanya kontra ilegal na droga maging sa lahat ng uri ng krimen upang masiguro ang kaligtasan, kaayusan, at kapayapaan ng bawat mamamayan.
