Arestado ang isang (1) magsasaka sa Barangay Nappaccu Grande ng Reina Mercedes, Isabela matapos mahulihan ng baril, bala, granada at iligal na droga.
Kinilala ang magsasaka na si Romeo Mangabat, 53 anyos, at residente ng nasabing barangay.
Sinalakay ng Reina Mercedes Police Station ang tinutuluyan ni Mangabat sa bisa ng Search Warrant na inisyu ni Presiding Judge Andrew Barcena ng RTC Branch 17 sa Ilagan City para sa kasong paglabag sa Republic Act 10591 o Firearms and Ammunition Regulation Act.
Narekober ng mga otoridad ang isang (1) unit ng caliber .22 na may apat (4) na bala, isang (1) granada, dahon ng marijuana at tatlong (3) bala ng caliber .38 na baril.
Ayon kay PCpt Christopher Danao, ang hepe ng Reina Mercedes PS, nag-ugat ang naturang operasyon matapos makatanggap ng reklamo ang kanilang himpilan mula sa isang biktima na nagsampa ng kasong statutory rape laban kay Mangabat. Ginagamit umano ng suspek ang kanyang baril para takutin ang biktima.
Nasa kustodiya na ng pulisya si Mangabat na haharap sa kasong paglabag sa Republic Act 10591 at Republic Act 9165 o Comprehensive Dangerous Drugs Act of 2002.
Patuloy ang isinasagawang operasyon ng PNP Isabela kontra krimen at iligal na droga upang matiyak na ligtas at mapayapa sa naturang probinsya.
#####
Panulat ni: Police Corporal Josephine T Blanche
