Dasmariñas City, Cavite – Tinatayang Php170,000 halaga ng shabu ang nasabat sa isang senior citizen sa isinagawang buy-bust operation ng PNP-PDEU CALABARZON nito lamang Biyernes, Setyembre 23, 2022.
Kinilala ni Police Brigadier General Jose Melencio Nartatez, Jr, Regional Director ng Police Regional Office 4A, ang suspek na si Rolando Arcena Esguerra, alias “Tatay”, 63, residente ng Brgy. Paliparan 2, Dasmariñas City, Cavite.
Ayon kay PBGen Nartatez Jr, bandang 6:55 ng gabi naaresto ang suspek sa Brgy. Paliparan 2, Dasmariñas City, Cavite ng pinagsamang operatiba ng Philippine Drug Enforcement Unit, Cavite Police Provincial Office at Regional Police Drug Enforcement Unit, Cavite.
Narekober mula sa suspek ang dalawang pirasong heat-sealed transparent plastic sachets ng pinaghihinalang shabu na may timbang na 25 gramo at tinatayang nagkakahalaga ng Php170,000, isang pirasong Php500 bill at walong pirasong pekeng Php1,000 bill bilang boodle money.
Nahaharap ang suspek sa kasong paglabag sa Section 5 at 11, Article II ng Republic Act 9165 o Comprehensive Dangerous Drugs Act of 2002.
Patuloy ang Cavite PNP na palakasin ang mga estratehiya sa paglaban sa ilegal na droga para sugpuin ang produksyon at pagbebenta ng mga ilegal na droga at magkaroon ng ligtas, maayos at mapayapang probinsya.
Source: Police Regional Office 4A
Panulat ni Police Staff Sergeant Donabel Dulin
