Masbate – Pinagkalooban ng Scholarship ng Masbate 1st Provincial Mobile Force Company ang isang batang may kapansanan at estudyante ng Canahig Elementary School nito lamang Setyembre 20, 2022.
Ang naturang proyekto ay may temang “Project A.B.T.I.K” (Ating mga Batang mag-aaral Tulungan makamit Inaasam na Karunungan) na pinangunahan ni Police Lieutenant Colonel Norlando F Mesa, Force Commander.
Kinilala ang naging benepisyaryo na si Jihu T. Columna, 11 taong gulang, isang Person With Disability, bunso sa anim na magkakapatid, anak nina Rolando na isang construction worker at Jocelyn na walang permanenteng trabaho.
Si Jihu ay kasalukuyang nasa ikaapat na baitang sa Canahig Elementary School kung saan araw-araw siyang hinahatid ng kanyang ina gamit ang kanyang lumang wheel chair.
Napukaw ang damdamin ng ating kapulisan sa kanya dahil sa dedikasyon nitong mag-aral at mataas ang pangarap sa buhay sa kabila ng kanyang kapansanan.
Pinatunayan niya lamang na hindi balakid ang kapansanan upang makapag-aral, bagkus ay nagsilbi itong inspirasyon sa ibang kabataan na nagsusumikap din sa pag-aaral.
Bagamat sa murang edad ay ramdam na ni Jihu ang kahirapan ngunit lagi siyang positibo sa pagharap sa mga pagsubok. Sa katunayan ay siya ang kasalukuyang pangulo ng PWD Association sa kanilang barangay.
Ang Project A.B.T.I.K ay naaayon sa programang MKK=K o Malasakit, Kaayusan, Kapayapaan tungo sa Kaunlaran na naglalayong mabigyan ng pagkakataong makapag-aral ang mga batang may dedikasyong makapagtapos sa pag-aaral upang maiahon ang kanilang pamilya sa kahirapan.
Source: Masbate 1st PMFC
Panulat ni Pat Jomar Danao
