Pinagbuhatan, Pasig City – Tinatayang Php6.2 milyong halaga ng shabu ang nakumpiska sa isang Newly Identified High Value Individual (NIHVI) sa isinagawang buy-bust operation ng Pasig City Police Station nito lamang Martes, Setyembre 20, 2022.
Kinilala ni PBGen Jonnel C Estomo, Acting Regional Director ng NCRPO, ang suspek na si Jhun Lawrence Lao y Calagos alyas “Payat”, 18.
Ayon kay PBGen Estomo, bandang 3:15 ng madaling araw naaresto si Lao sa kahabaan ng Bolante 2, Brgy. Pinagbuhatan, Pasig City sa pinagsanib puwersa ng TMRU Pasig at SWAT Team ng Pasig CPS.
Narekober kay Lao ang humigit kumulang 917 gramo ng shabu na may Standard Drug Price na Php6,235,600.
Samantala, mahaharap naman si Lao sa kasong paglabag sa RA 9165 o Comprehensive Dangerous Drugs Act of 2002.
Ito ay kaugnay ng pagpapalakas ng pagsusumikap laban sa kriminalidad sa pamamagitan ng OPLAN S.A.F.E. ng NCRPO.
“Ang Team NCRPO ay patuloy na labanan ang ilegal na droga sa rehiyon.
Ang pag-agaw ng maliit o malaking volume ng ilegal na droga ay napakahalaga sa pakikipagsapalaran na ito”, ani PBGen Estomo.
Dagdag pa niya, “Hindi tayo titigil at hindi tayo magsasawa na gumawa ng mga hakbang para masabi ang mga masasamang gawaing ito na nakakasira ng ating mga kababayan lalo na ng mga kabataan at upang mahuli ang mga taong ito na nagpapakalat ng salot na droga sa ating komunidad. Binabati ko ang ating mga tauhan sa walang kapagurang dedikasyon na ipinamamalas nila.”
Source: PIO_NCRPO
Panulat ni PSSg Remelin M Gargantos
