Trento, Agusan del Sur – Arestado ang tatlong suspek matapos mahulihan ng matataas na uri ng baril sa ikinasang Joint Entrapment Operation ng Caraga PNP sa Purok 7, Maitom, Langkilaan, Trento, Agusan del Sur nito lamang Linggo, Setyembre 18, 2022.
Kinilala ni Police Brigadier General Romeo Caramat Jr, Regional Director, Police Regional Office 13, ang mga nadakip na sina Rowel Tangub, 43, sundalo, residente ng Paquibato District, Davao City; Delio Osorio Jr, 38, residente ng Brgy. Pagalungan, Polomoloc, South Cotabato; at Roger Dela Cerna, 31, businessman, residente ng P-2, Brgy. Osmeña, Bayugan City, Agusan del Sur.
Ayon kay PBGen Caramat Jr, bandang 10:15 ng umaga nang isagawa ang operasyon sa naturang lugar kung saan naharang ang isang kulay orange na Nissan Navarra Savanna na may Plate No. LAD2885 ng mga tauhan ng 1303rd Maneuver Company ng Regional Mobile Force Battalion 13, Regional Intelligence Unit 13, Trento Municipal Police Station at Intelligence Unit ng Philippine Army.
Narekober sa mga suspek ang dalawang M16 rifle, isang Rock Island caliber .45 pistol, isang pirasong M-16 magazine, dalawang pirasong magazine ng caliber .40 pistol, tatlong pirasong magazine ng caliber .45 pistol at iba pang uri ng bala.
Ang mga suspek ay nahaharap sa kasong paglabag sa Republic Act 10591 o Comprehensive Firearms and Ammunition Regulation Act.
Patuloy ang pagsusumikap ng Caraga PNP na mabantayan ang naturang rehiyon sa anumang banta ng krimen upang masiguro ang kaligtasan ng bawat mamamayan.
Panulat ni Patrolman Jhunel Cadapan/RPCADU13
