Mexico, Pampanga – Tinatayang Php408 milyong halaga ng shabu ang nakumpiska sa dalawang Chinese National sa isinagawang buy-bust operation ng PNP at PDEA sa Lakeshore North Luzon Expressway, Mexico, Pampanga nito lamang Miyerkules, Setyembre 14, 2022.
Kinilala ni Police Brigadier General Cesar Pasiwen, Regional Director ng Police Regional Office 3, ang dalawang suspek na sina Wenjie Chen, 45, residente ng Brgy. San Antonio, Gerona, Tarlac at Sy Yan Qing, 42, residente ng Angeles City.
Ayon kay PBGen Pasiwen, bandang 1:45 ng hapon nang maaresto ang dalawang suspek sa pinagsanib pwersa ng Provincial Drug Enforcement Unit, Pampanga Police Provincial Office, Special Operation Unit National Capital Region, PNP Drug Enforcement Group, Regional Field Unit 3 at NCR ng Criminal Investigation and Detection Group, Philippine Drug Enforcement Agency NCR at Bureau of Customs – Customs Intelligence and Investigation Service.
Narekober mula sa dalawang suspek ang 60 kilogramo na hinihinalang shabu na may tinatayang halaga na Php408,000,000; limang Php1,000 bill na ginamit bilang marked money; isang cellular phone at iba’t ibang Identification Cards at mga dokumento.
Ang dalawang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Ang Pambansang Pulisya ay patuloy ang ginagawang operasyon para tuluyang mahuli ang mga nagbebenta at gumagamit ng ilegal na droga at maging malaya sa ipinagbabawal na gamot na sumisira sa kinabukasan ng ating mga mamamayan.
Source: Police Regional Office 3
Panulat ni Police Corporal Jeselle Rivera
