Puerto Galera, Oriental Mindoro – Timbog ang isang High Value Individual sa isinagawang buy-bust operation ng Puerto Galera Municipal Police Station sa Sitio Interior, Barangay Balatero, Puerto Galera, Oriental Mindoro noong Setyembre 11, 2022.
Kinilala ni Police Captain Kim Badillo, Officer-In-Charge ng Puerto Galera MPS, ang suspek na si “Bentong”, tricycle driver at residente ng Big Tabinay, Puerto Galera, Oriental Mindoro.
Ayon kay PCpt Badillo, naaresto ang suspek ng pinagsanib na puwersa ng mga tauhan ng Puerto Galera MPS, kasama ang Oriental Mindoro Police Provincial Office Drug Enforcement Unit.
Ayon pa kay PCpt Badillo, nakuha mula sa suspek ang isang sachet na naglalaman ng pinaghihinalang shabu kapalit ng halagang Php500, hudyat upang siya ay arestuhin ng mga otoridad.
Kumpiskado din sa suspek ang tatlo pang sachet na naglalaman ng pinaghihinalaang “shabu” at isang tricycle.
Dagdag pa ni PCpt Badillo, nahaharap ang suspek sa kasong paglabag sa Section 5 at Section 11 ng Republic Act 9165 o mas kilala bilang Comprehensive Dangerous Drugs Act of 2002.
“Patuloy po ang ating operasyon laban sa ilegal na droga at asahan po ninyo ang mas maigting naming pagtutok dito, magtulungan po tayo”, ani Police Captain Badillo.
Source: PG Mps OrMin Ppo
Panulat ni Patrolman Erwin Calaus
