Davao City – Arestado ang isang lalaki sa isinagawang buy-bust operation ng PNP at PDEA sa Cabayugan 1, Km 11, Sasa, Davao City, noong Setyembre 11, 2022.
Kinilala ni PMaj Jake Goles, Station Commander ng Sasa Police Station, ang suspek na si alyas “Omar”, 39, residente ng Purok 4, Libuak Babak, IGACOS, na tinaguriang Top 5 High Value Individual sa regional level.
Ayon kay PMaj Goles, naaresto ang suspek ng pinagsamang tauhan ng Special Drug Enforcement Unit ng Sasa PS kasama ang Davao City Maritime Police Station at 1105th Maneuver Company, Regional Mobile Force Battalion 11 katuwang ang City Intelligence Team at PDEA XI.
Dagdag pa ni PMaj Goles, nakuha mula sa suspek ang ilang pakete ng hinihinalang shabu na may bigat na humigit kumulang 7.76 gramo na may street market value na Php10,500 at isang Caliber .38 revolver na may serial number 00311 kasama ang apat na bala.
Ang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002 at Republic Act 10591 o Comprehensive Firearms and Ammunition Regulation Act.
Ang pagkakadakip sa suspek ay resulta ng malasakit na ipinapakita ng mga mamamayan sa lungsod at susi upang makamit ang kaayusan at kapayaan sa bansa tungo sa kaunlaran.
Panulat ni Patrolman Alfred Vergara
