Bacoor City, Cavite – Tinatayang Php170,000 halaga ng shabu ang nasabat sa isang High Value Individual (HVI) sa isinagawang PNP buy-bust nito lamang Setyembre 10, 2022.
Kinilala ni Police Colonel Christopher Olazo, Officer-In-Charge, Cavite Police Provincial Office, ang suspek na si Ian Tupag, alyas “Naif”, HVI, 26, walang asawa, walang trabaho, residente ng Block 15 Lot 11 Fatima 1, Dasmariñas City, Cavite.
Ayon kay PCol Olazo, bandang 1:00 ng madaling araw naaresto ang suspek sa Brgy. Molino 4, Bacoor City, Cavite ng mga operatiba ng Cavite PNP Drug Enforcement Unit at Regional PNP Drug Enforcement Unit.
Narekober mula sa suspek ang isang pirasong heat-sealed transparent plastic sachet ng pinaghihinalang shabu na may timbang na 25 gramo at tinatayang nagkakahalaga ng Php170,000, 42 pirasong Php1,000 bill, at isang pirasong Php500 bill na ginamit bilang buy-bust money.
Nahaharap ang suspek sa kasong paglabag sa Section 5 at 11, Article II ng Republic Act 9165 o Comprehensive Dangerous Drugs Act of 2002.
Patuloy ang PNP sa pagpapaigting sa kampanya laban sa ilegal na droga at hinihikayat ang mga mamamayan na makiisa sa tuluyang pagsugpo ng talamak na pagbebenta at paggamit ng droga sa komunidad na nakasira sa buhay ng mga mamamayan lalo na ang kinabukasan ng mga kabataan.
Source: Cavite Police Provincial Office PIO
Panulat ni Police Staff Sergeant Donabel Dulin
