Lucena City, Quezon – Tinatayang Php1,489,200 halaga ng shabu ang nasabat sa isang High Value Individual (HVI) sa isinagawang PNP buy-bust operation sa University Site, Brgy. Ibabang Dupay, Lucena City, Quezon nito lamang Sabado, Setyembre 10, 2022.
Kinilala ni Police Colonel Ledon Monte, Officer-In-Charge, Quezon Police Provincial Office, ang suspek na si Patricio Diamsin Martin, alyas “Nonoy”, 49, residente ng Purok Happy Value, Brgy. Ibabang Dupay, Lucena City.
Ayon kay PCol Monte, bandang 12:23 ng madaling araw naaresto ang suspek ng pinagsanib puwersa ng PNP Drug Enforcement Unit-Quezon, Provincial Intelligence Unit-Quezon, at Lucena City Police Station Drug Enforcement Team.
Narekober mula sa suspek ang 14 pirasong heat-sealed transparent plastic sachets ng pinaghihinalang shabu na may timbang na 73 gramo at tinatayang nagkakahalaga ng Php1,489,200, isang sling bag, 13 pirasong Php1,000 bill, isang pirasong Php1,000 bill bilang boodle money at isang pitaka.
Nahaharap ang suspek sa kasong paglabag sa Section 5 at 11, Article II ng Republic Act 9165 o Comprehensive Dangerous Drugs Act of 2002.
Patuloy ang Quezon PNP sa pagpapaigting sa kampanya laban sa ilegal na droga at hinihikayat ang mga mamamayan na makiisa sa tuluyang pagsugpo ng talamak na pagbebenta at paggamit ng droga para sa ligtas at mapayapang probinsya.
Source: Quezon Police Provincial Office PIO
Panulat ni Police Staff Sergeant Donabel Dulin
