Camp BGen Rafael T. Crame, Quezon City – Pinagkalooban ng Performance Government System (PGS) Institutionalized Status ang tanggapan ng Directorate for Investigation and Detective Management (DIDM) kasabay ng Monday Flag Raising Ceremony ngayong araw, ika-5 ng Setyembre 2022, sa PNP National Headquarters, Camp BGen Rafael T Crame, Quezon City.
Ang naturang conferment status ay ang huling yugto ng PGS kung saan ginawaran din ng Gold Eagle award ang DIDM sa pamumuno ni Police Major General Omega Jireh D. Fidel, Director, DIDM, bilang pagkilala sa pagtamo ng gradong 97.05% nang sumailalim sa PGS Institutionalization and Evaluation Process.
Samantala, ginawaran din ng pagkilala at medalya ang sampung kapulisan mula sa Police Regional Office 6 at Police Regional Office 4A dahil sa kanilang kapuri-puring pagganap ng kanilang sinumpaang tungkulin.
Binati at pinuri naman ni Police Lieutenant General Chiquito M. Malayo, The Deputy Chief PNP for Administration (TDCA), at kasalukuyang Officer-In-Charge ng Philippine National Police, ang mga kapulisang ginawaran ng parangal at conferment ng institutionalized status ng DIDM.
Hinimok din niya ang bawat kapulisan na maglingkod sa bayan ng may kasigasigan, respeto sa bawat isa at determinasyon sa pagsasagawa ng mandato ng PNP upang labanan ang kriminalidad, ilegal na droga, insurhensiya, terorismo at kurapsyon sa ating bansa.
