Novaliches, Quezon City — Tinatayang Php170,600 halaga ng shabu ang nasabat sa dalawang suspek sa isinagawang buy-bust operation ng Novaliches Police Station-4 ng QCPD nito lamang Biyernes, Setyembre 2, 2022.
Kinilala ni Quezon City Police District Director, PBGen Nicolas D Torre III, ang mga suspek na sina Almer Basa, 29, residente ng Brgy. Bagbag, Quezon City, at Mama Nanding, 49, residente ng Brgy. 17, Caloocan City.
Ayon kay PBGen Torre lll, bandang alas-9:00 ng gabi naaresto sina Basa at Nanding sa harap ng 7-Eleven Convenience Store na matatagpuan sa kahabaan ng Quirino Hi-way, Brgy. Bagbag, Novaliches, Quezon City sa pinagsanib puwersa ng PS-4 ng QCPD at ng PDEA-Quezon City.
Nakumpiska sa mga suspek ang humigit kumulang 25 gramo ng shabu na nagkakahalaga ng Php170,600, cellular phone, at ang buy-bust money.
Samantala, kakasuhan ang mga suspek ng paglabag sa R.A. 9165 o ang Comprehensive Dangerous Drugs Act of 2002.
Pinuri ni PBGen Torre III ang mga operatiba ng PS 4 sa kanilang tiyaga at dedikasyon sa kanilang sinumpaang tungkulin lalo na sa walang humpay na kampanya laban sa ilegal na droga.
“Pinupuri ko ang mga operatiba na nagsagawa ng anti-illegal drug buy-bust operations na humantong sa pagkakaaresto sa mga suspek at pagkakumpiska ng mga piraso ng ebidensya. Malaki ang maitutulong ng operasyong ito sa mga accomplishments ng NCRPO lalo na sa ating pinaigting na kampanya laban sa ilegal na droga sa ating area of responsibility,” ani naman ni PBGen Jonnel C Estomo, ang Acting Regional Director ng National Capital Region Police Office (NCRPO).
Source: Pio Qcpd
Panulat ni PSSg Remelin M Gargantos
