New Lower, Taguig City — Umabot sa Php408,000 halaga ng shabu at baril ang nakumpiska sa dalawang suspek sa isinagawang buy-bust operation ng kapulisan ng Southern Police District nito lamang Linggo, Agosto 28, 2022.
Kinilala ni Police Colonel Kirby John Kraft, Acting District Director ng SPD, ang mga suspek na sina Itan Gampong Dikalnan, 36, construction worker (HVI/Pusher) at Mark Gonzales Salipan, 37, construction worker (SLI/ Pusher).
Ayon kay PCol Kraft, pasado alas-10:00 ng gabi nang maaresto sina Dikalnan at Salipan sa MLQ Street Barangay New Lower, Taguig City ng mga operatiba ng District Drug Enforcement Unit at District Mobile Force Battalion ng SPD.
Narekober sa mga suspek ang walong heat-sealed transparent plastic sachet na naglalaman ng hinihinalang shabu na humigit-kumulang 60 gramo ang bigat, gray na pouch, isang itim na caliber 45 revolver walang serial number at kargado ng pitong live ammunition, isang Smith at Wesson caliber 38 revolver na may serial number at may apat na pirasong caliber 38 live ammunition, at Php1,000 na ginamit bilang buy-bust money.
Samantala, mahaharap naman ang mga suspek sa kasong paglabag sa Sections 5 at 11 ng Art II ng RA 9165 o Comprehensive Dangerous Drugs Act of 2002 at RA 10591 o Comprehensive Firearms and Ammunition Regulation Act.
Patuloy naman ang SPD sa kanilang laban kontra ilegal na droga sa pamamagitan ng pagtutok sa mga priority High-Value Individuals targets (HVIs), at pagbaba ng supply at demand ng droga kasama ang paghuli sa mga street level drug pushers.
Source: SPD PIO
###
Panulat ni PSSg Remelin M Gargantos
