Peñablanca, Cagayan – Nasagip ng pulis ang isang estudyante sa tangkang pagpapakamatay nito sa kasagsagan ng bagyong Florita sa Josepha Bridge Peñablanca, Cagayan nito lamang Martes, ika-23 ng Agosto 2022.
Kinilala ni Police Major Harold P Ocfemia, Officer-In-Charge ng Peñablanca Police Station, na si alyas “Honey”, 19, isang estudyante, residente ng Barangay Alimanao, Peñablanca, Cagayan.
Ayon kay PMaj Ocfemia, habang nagpapatrolya ang mga kapulisan ng Peñablanca sa kasagsagan ng bagyong florita nakita nila ang isang babae na nakaupo sa tabi ng Josepha Bridge at nagbabalak tumalon mula sa tulay na agad namang napigilan ng mga pulis.
Dagdag pa ni PMaj Ocfemia, problema sa pamilya ang kinakaharap ng dalaga kaya nito naisipan ang tangkang pagpapakamatay.
Sa ngayon nasa ligtas na ang dalaga at nai-turn over na sa kaniyang mga magulang.
Samantala, pinuri naman ang kabayanihan ng PNP sa hindi matatawarang pagmamalasakit at agarang pagligtas sa dalaga.
Source: Peñablanca PNP
###
Panulat ni Police Corporal Jermae D Javier
