General Santos City – Tinatayang Php3,400,000 halaga ng shabu ang nasabat sa isang suspek sa isinagawang buy-bust operation ng PNP sa Room 5, Runway Inn, Blk. 10, Prk. Suiza, Brgy. Fatima, General Santos City noong ika-21 ng Agosto 2022.
Kinilala ni Police Brigadier General Jimili Macaraeg, Regional Director ng Police Regional Office 12 (PRO 12), ang naarestong suspek na si Sanny Lloyd Mamaluba, residente ng Doña Soledad Barangay Labangal, General Santos City.
Ayon kay PBGen Macaraeg, naging matagumpay ang operasyon sa pinagsanib na pwersa ng mga operatiba ng Police Regional Office 12 mula sa Special Operations Unit 12, PNP Drug Enforcement Group kasama ang Regional Police Drug Enforcement Unit 12 at City Police Drug Enforcement Unit ng General Santos City Police Office.
Dagdag pa ni PBGen Macaraeg, narekober mula sa suspek ang sampung pirasong medium-sized heat-sealed transparent plastic sachet na naglalaman ng puting crystalline substance na pinaniniwalaang shabu na may tinatayang halaga na Php3,400,000 na maayos na itinurn-over sa PNP Crime Laboratory 12 para sa laboratory examination.
Samantala, nahaharap sa kasong paglabag sa Sec. 5, 26 at Sec. 11 ng Art. II ng RA 9165 o “Comprehensive Dangerous Drugs Act of 2002” ang suspek.
Pinuri naman ni PBGen Macaraeg ang mga operatiba sa isang matagumpay na operasyon at idiniin ang kapuri-puring pangako nitong mas papaigtingin ang kanyang suporta sa anti-illegal drug campaign ng PNP.
Patuloy namang hinihikayat ng PNP ang publiko na tumulong sa pagbibigay ng impormasyon sa aktibidad na may kaugnayan sa ilegal na droga at anumang kriminalidad sa pinakamalapit na otoridad.
###
Panulat ni Patrolman Charnie Atienza Mandia
