Camp Crame, Quezon City – Maayos at payapa ang pagbubukas sa unang araw ng pasukan sa buong bansa, ayon sa pahayag ng Pambansang pulisya nitong alas 4 ng hapon, Lunes, Agosto 22, 2022.
Tinatayang nasa 40,000 pribado at pampublikong paaralan ang nagsabi ng maayos at walang aberya sa pagbubukas ng pasukan sa kani-kanilang mga paaralan base sa kanilang isinumiteng ulat.
Ito ay pinagtibay naman ni PNP Chief, Police General Rodolfo S Azurin Jr. na patuloy ding nagmomonitor sa sitwasyon sa lahat ng 17 PNP Regional Offices sa pamamagitan ng PNP Command Center sa Camp Crame.
Nasa 23,000 PNP personnel ang idineploy ng himpilan sa buong bansa para sa Ligtas Balik-Eskwela 2022-2023.
Ang nasabing mga tauhan ay naatasang panatilihing ligtas ang iba’t ibang paaralan at iba pang mga pampublikong lugar na maaaring paglagihan ng mga mag-aaral, magulang at mga guro.
“We have opened our communication lines with school authorities so they can immediately call us in times of emergency or any security threat,” saad ni Gen. Azurin.
Gayunpaman, nananatiling naka-antabay ang Pambansang Pulisya sa lahat ng maaaring maging aberya sa pagpapatuloy ng face to face classes sa susunod na mga araw. Hinikayat naman ng PNP ang publiko na makipagtulungan sa mga awtoridad sakaling may hindi inaasahang mga insidente gaya ng street crime, fraternity o gang violence, bullying, at iba pang mga hindi kanais-nais na aktibidad.
Photo Courtesy by Kalibo MPS
