Badian, Cebu – Matiyagang pinuntahan at binisita ng mga tauhan ng Badian Police Station ang bahay ng isang 98 taong gulang na Nanay sa Brgy. Ginablan, Cebu nito lamang ika-12 ng Agosto 2022.
Ang naturang pagbisita ay pinangunahan ng mga miyembro ng nasabing istasyon sa direktang pamumuno ni Police Lieutenant Etelberto E Timagos.
Labis na nahabag sa kalagayan ni Nanay Lucilla Calabroso, 98 taon gulang, may isang anak na kasama rin niya sa kaniyang tahanan, kaya naman walang pagdadalawang-isip nilang pinuntahan ang matanda upang bigyan ng groceries, bigas at gulay na makakatulong sa kanilang pang araw-araw na pamumuhay.
Malugod namang tinanggap ni Nanay ang munting regalo mula sa kapulisan na may kaakibat na luha sa mga mata dala ng labis na galak sa presensya at pagkalinga sa kanya ng mga kapulisan.
Tagos sa puso naman ang kasiyahan ng Bandian PNP matapos nilang matulungan si Nanay Lucilla, na ayon pa sa mga ito, mas lalong nabuhay ang kagustuhan nilang tumulong at magpadama ng kanilang serbisyong tapat at malasakit sa mga residenteng kanilang sinasakupan.
Tinitiyak naman ng Badian PNP na gagawin nila ang kanilang makakaya upang maipaabot ang serbisyong nararapat sa lahat ng kanilang nasasakupan lalong-lalo na sa mga nasa laylayan ng lipunan.
###
Panulat ni Patrolwoman Kyla Hannah Evangelista
