Mabalacat City, Pampanga – Tinatayang Php103,500 halaga ng shabu ang nakumpiska sa tatlong suspek sa isinagawang buy-bust operation ng Mabalacat City PNP at Philippine Drug Enforcement Agency nito lamang Biyernes, ika-12 ng Agosto 2022.
Kinilala ni Police Lieutenant Colonel Protom Guevarra, Acting Chief of Police ng Mabalacat City Police Station, ang tatlong suspek na sina Christian Pecson, 26; Josephine Ongoco, 22; at Harly Nolasco, 27, habang nakatakas naman si Eric Garcia, pawang mga residente ng Brgy. Dau, Mabalacat City, Pampanga.
Ayon kay PLtCol Guevarra, bandang 3:45 ng hapon nang maaresto ang mga suspek sa Roxas Street Brgy. Dau, Mabalacat City, Pampanga ng pinagsanib pwersa ng Mabalacat City Police Station-Station Drug Enforcement Team at Philippine Drug Enforcement Agency Nueva Ecija Provincial Office.
Narekober mula sa mga suspek ang anim na pirasong heat-sealed transparent plastic sachets na tumitimbang ng 15 gramo na tinatayang nagkakahalaga ng Php103,500; at isang pirasong Php1,000 bill na ginamit bilang marked money.
Nahaharap ang mga suspek sa kasong paglabag sa Section 5, 6, 7, 11, 12, 13, 14, at 15 ng Article II Republic Act 9165 o Comprehensive Dangerous Drugs Act of 2002.
Patuloy pa rin ang ginagawang operasyon ng PNP para tuluyang mahuli ang mga nagbebenta at gumagamit ng ilegal na droga at maging malaya ang ating bansa sa ipinagbabawal na gamot na sumisira sa kinabukasan ng ating mamamayan.
Source: Mabalacat City Police Station
###
Panulat ni Police Corporal Jeselle Rivera
