Bacolod City – Umabot sa Php550,800 na halaga ng shabu ang nasabat sa buy-bust operation ng pulisya sa Purok Kawayan, Brgy. Banago, Bacolod City, Negros Occidental nito lamang ika-9 ng Agosto, 2022.
Kinilala ni Police Colonel Thomas Joseph Martir, City Director ng Bacolod City Police Office ang mga suspek na sina Rodmar Abada y Didoyco alyas “Zan”, 37 at Aunice Latuna y Almarel alyas “Denice”, 28, parehong mga residente ng Purok Kawayan, Brgy. Banago, Bacolod City.
Ayon kay PCol Martir, naaresto ang mga suspek ng mga operatiba ng City Drug Enforcement Unit ng Bacolod City Police Office matapos magbenta ang mga suspek sa isang police poseur buyer ng isang piraso ng heat-sealed transparent plastic sachet na naglalaman ng hinihinalang shabu na nagkakahalaga ng Php1,000.
Ayon pa kay PCol Martir, nakumpiska sa mga suspek ang 21 na piraso ng heat-sealed transparent plastic sachet na naglalaman ng hinihinalang shabu na may kabuuang timbang na 81 grams na may market value na nagkakahalaga ng Php550,800.
Nahaharap ang mga suspek sa paglabag ng Republic Act 9165 o Comprehensive Dangerous Drugs Act of 2002.
Sinisiguro ng Bacolod City PNP na mas lalo pang paiigtingin ang mga operasyon laban sa ilegal na droga at mahuli ang mga taong pananagutan sa batas.
###
