Camp Crame, Quezon City – Opisyal na ginawaran ng pinakamataas na parangal ang Police Regional Office 5 (PRO5) bilang Outstanding Regional Community Affairs and Development Division para sa taong 2022 kasabay ng pagdaraos ng ika-27th Police Community Relations Month Culminating Activity nito lamang ika-28 ng Hulyo 2022 na ginanap sa Multi – Purpose Center, Camp BGen Rafael T. Crame, Quezon City.
Personal na tinanggap ng pamunuan ng PRO 5 ang parangal sa ilalim ng kasalukuyang Regional Director na si Police Brigadier General Mario A. Reyes ang nasabing pagkilala sa mga naging kontribusyon at mga programa ng PNP KASUROG COPS sa mga Bicolano kaugnay sa pagdiriwang ng PCR Month na may temang “Ugnayang Pulisya at Komunidad Tungo sa Mapayapa, Maayos at Maunlad na Pamayanan”.
Ginawaran din ng parangal sa kategorya ng individual awards si Police Colonel Jonathan O. Panganiban, bilang Outstanding Police Community Affairs Senior Police Commissioned Officer sa kanyang mga inisyatibong hakbangin at mga proyekto upang mas lalong tumibay ang ugnayan ng Pulisya at Komunidad sa buong rehiyon.
Samantala, pinarangalan din ang Sta. Elena Municipal Police Station sa ilalim ng pamumuno ni Police Major Kim Lawrence R. Arenas, Chief of Police bilang Outstanding Municipal Police Station sa buong bansa dahil sa programa nitong “Sta. Elena Municipal Police Station Scholar” o ang Project SEMPS na kung saan ito ang naging daan upang makapagtapos sa kolehiyo sa kursong BS Criminology ang kanilang kauna-unahang benipisyaryo na anak ng isang magsasaka.
Umani ng paghanga ang proyektong ito mula sa mga netizens at nagsilbing inspirasyon at pag-asa sa mga kabataang nangangarap na makapagtapos ng pag-aaral ngunit kapos sa pinansyal na aspeto.
Ang PRO 5 ay patuloy na maglulunsad ng mga programa na makakatulong sa kabataan upang mas lalong mapagtibay ang ugnayan ng PNP at komunidad tungo sa maayos at maunlad na Rehiyon Bikol.
Panulat ni Patrolman Rodel Grecia
