Cagayan de Oro City – Tinatayang Php374,000 halaga ng shabu ang nakumpiska sa isinagawang joint buy-bust operation ng mga tauhan ng Police Regional Office 10 sa tatlong High Value Individual (HVI) nito lamang Martes, Hulyo 19, 2022.
Kinilala ni Police Brigadier General Benjamin Acorda Jr, Regional Director ng Police Regional Office 10, ang mga suspek na sina Jasper Lura, 34, residente ng Zone 5, Bugo, Cagayan de Oro City; Ian Edroso, 27, residente ng Kiburiao, Quezon, Bukidnon; at ang nakatakas na suspek na si Felix L Rebolos, 31, residente ng Zone 5, Bugo, Cagayan de Oro City, pawang mga kasama sa Directorate Intelligence Listed at High Value Target.
Ayon kay PBGen Acorda, naaresto ang mga suspek bandang 2:50 ng madaling araw sa Zone 1, Bantiles, Bugo, Cagayan de Oro City ng Regional Drug Enforcement Unit 10, PNP Drug Enforcement Group-Special Operation Unit 10 at Cagayan de Oro City Police Office-Station 6.
Ayon pa kay PBGen Acorda Jr., nakumpiska sa operasyon ang siyam na pirasong plastic sachets na naglalaman ng hinihinalang shabu at tumitimbang ng 55 gramo at tinatayang nagkakahalaga ng Php374,000.
Ang dalawang suspek ay nahaharap sa kasong paglabag sa RA 9165 o Comprehensive Dangerous Drugs Act of 2002.
Ang Police Regional Office 10 ay patuloy sa pagsasagawa ng mga operasyon laban sa mga gumagamit at tulak ng ilegal na droga upang mapanatiling ligtas at payapa ang nasasakupang rehiyon.
###
Patrolman Joshua Fajardo/ RPCADU 10
