Nueva Ecija – Tinatayang Php274,720 halaga ng shabu ang nakumpiska ng mga tauhan ng Police Regional Office 3 sa isang High-Value Individual nito lamang ika-16 ng Hulyo 2022.
Kinilala ni Police Colonel Jess B Mendez, Acting Provincial Director, Nueva Ecija Police Provincial Office, ang suspek na si Marlon Salvador, 37, residente ng Barangay Mahipon, Nueva Ecija at kabilang sa High Value Individual at nasa Top 10 drug personalities sa Gitnang Luzon.
Ayon kay PCol Mendez, naaresto ang suspek bandang 5:20 ng hapon sa Barangay Mahipon, Nueva Ecija ng pinagsanib na puwersa ng Gapan City Police Station, Regional Mobile Force Battalion 3, 1st Provincial Mobile Force Company 4th Maneuver Platoon at Regional Drug Enforcement Group Special Operation Unit.
Ayon pa kay PCol Mendez, nakumpiska mula sa suspek ang isang shotgun, isang 22 caliber rifle, isang caliber 38 revolver, isang airgun, isang hand grenade at samut-saring bala at 40.4 gramo ng shabu na nagkakahalaga ng Php274,720.
Dagdag pa ni PCol Mendez, naaresto ang suspek sa bisa ng Warrant of Arrest sa kasong paglabag sa Republic Act 10591 o Comprehensive Firearms and Ammunition Regulation Act at Republic Act 9165 o Comprehensive Dangerous Drugs Act of 2002.
Pinuri naman ni PCol Mendez ang matagumpay na operasyon ng PRO 3 sa pagpapaigting sa kampanya kontra kriminalidad at ilegal na droga sa probinsya ng Nueva Ecija.
Source: Pio Nueva Ecija Pnp
###
Panulat ni Patrolwoman Hazel Rose Bacarisa
