Camp Bagong Diwa, Taguig City – Nagsagawa ng 1st Inter-Agency Coordination Meeting ang NCRPO bilang paghahanda sa seguridad sa unang State of the Nation Address ni President Ferdinand “Bongbong” Marcos Jr. nito lamang Biyernes, Hulyo 15, 2022 sa Hinirang Multi-purpose Hall, Camp Bagong Diwa, Bicutan, Taguig City.
Ang pagpupulong na ito ay pinangunahan ni NCRPO Regional Director, PMGen Felipe Natividad kasama ang mga kinatawan mula sa Armed Forces of the Philippines (AFP), Local Government Units (LGUs), Metro Manila Development Authority (MMDA), Philippine Coast Guard (PCG), Bureau of Fire Protection (BFP), Bureau of Jail Management and Penology (BJMP), Force Multipliers, Volunteer groups, at iba pang ahensya.
Dito inilatag ang mga contingency plan ng grupo para sa maayos na seguridad sa loob at labas ng House of Representatives, kung saan gaganapin ang SONA.
Dinagdagan ng humigit-kumulang 21,853 (dating 15,174) ang mga pwersang panseguridad na ide-deploy; 16,964 mula sa organic NCRPO personnel, 1,905 mula sa PNP Support Units at 2,974 mula sa iba pang coordinating agencies at peacekeeping partners.
Sususpendehin din ang pagdadala ng mga baril sa National Capital Region na magsisimula sa Hulyo 22 hanggang Hulyo 27 ngayong taon.
Asahan ang mas mahigpit na inspeksyon ng pulisya sa pagsasagawa ng mga checkpoint at “Oplan Sita,” foot/mobile patrol at iba pang operasyon/interbensyon na may koneksyon sa mga loose firearms.
Magkakaroon din ng road re-routing na syang inihanda naman ng MMDA para sa mabilis pa rin na daloy ng trapiko malapit sa venue.
“Kami ay nasasabik na iulat na ang lahat ay nagtutulungan sa pagtugon sa ilang mga pagkukulang sa pangkalahatang plano. Patuloy kaming magsasagawa ng coordination meetings hindi lamang sa aming mga partners at counterparts kundi pati na rin sa mga lider ng komunidad at civil society upang matukoy at matugunan ang mga alalahanin nang sa huli ay makamit ang isang mapayapa at ligtas na SONA ni PBBM,” ani PMGen Natividad.
Source: PIO_NCRPO
###
Panulat ni PSSg Remelin M Gargantos
