Sa loob ng 16 na taon na pagtatago, naaresto sa ginawang manhunt- operation ang Rank 3 City Most Wanted Person sa lungsod ng Tabaco noong Nobyembre 1, 2021 sa dakong 11:30 ng umaga.
Ayon kay PCol Arnold C Santiago, Provincial Director ng Albay, nahuli ang suspek sa ikinasang manhunt-operation ng Tabaco CPS sa Purok 3, Poblacion, Malinao, Albay, bitbit ang ibinabang “Warrant of Arrest” na ipinalabas ng korte noong Oktubre 28, 2005 para sa dalawang (2) bilang ng kaso ng “Rape”.
Kinilala ang suspek sa pangalang “Jovy”, 55 taong gulang, manggagawa, at naninirahan sa Purok 3, Brgy. San Roque, Tabaco City.
Ang nasabing suspek ay nasa pangangalaga ng Tabaco City Police Station habang inihahanda ang paglipat sa kanya sa korte na magtatakda ng kanyang kulungan sapagkat walang kaakibat na piyansa ang kasong kanyang kinakaharap.
“Hindi dahilan ang katagalan ng pagtatago ng isang kriminal. Hindi sila makakatakas sa matatalas na mata at mababagsik na kamay ng Albay Kasurog Cops, na walang ibang nais kundi ang mahanap at mapanagot ang lahat ng nakagawa ng krimen ng sa gayon ay masiguro na mabigyan ng hustisya ang lahat ng tao na naging biktima ng anumang karahasan,” paalala ni PCol Santiago.
Source: Albay PPO
#####
Article by Patrolwoman Shier Kye V Ignacio
