Marantao, Lanao del Sur – Nauwi sa engkwentro ang paghahain ng warrant of arrest ng Criminal Investigation and Detection Group BAR na kung saan ay napatay ang suspek sa Barangay Tuka Kialdan, Marantao, Lanao del Sur noong Hulyo 11, 2022.
Kinilala ni PLtCol Bernard Lao, Acting Regional Chief, Regional Field Unit, CIDG BAR ang suspek na si Jack Macaraya na may Warrant of Arrest para sa kasong robbery with homicide.
Ayon sa report, si Macaraya ang responsable sa pagpatay sa isang ustadz, o isang Islamic religious leader, sa isang liblib na lugar sa Marantao na nawalan pa ng malaking halaga ng pera, ilang linggo pa lang ang nakakalipas.
Ihahain lamang sana ng CIDG BAR ang Warrant of Arrest ngunit binunot ng suspek ang kanyang calibre .45 na baril at agad na nagpaputok dahilan sa pagkakaroon ng engkwentro na sanhi ng kanyang pagkamatay.
Hinihikayat ng PNP na makipagtulungan na lang sa mga otoridad ng sa gayon ay hindi na humantong sa ganitong pangyayari.
###
Panulat ni Patrolman Mark Vincent Valencia
