Trento, Agusan del Sur – Kumpiskado ang tinatayang nasa Php432,000 halaga ng rattan poles o yantok sa isinagawang Anti-Illegal Logging Operation ng Caraga PNP na nagresulta sa pagkaaresto ng dalawang truck driver nito lamang Sabado, Hulyo 9, 2022.
Kinilala ni Police Brigadier General Romeo Caramat Jr, Regional Director ng Police Regional Office 13, ang dalawang driver na nadakip na sina Jeson Salvador, 40, residente ng KM 12 Suha Village, Sasa, Davao City at si Efren Granule, residente ng Baguio, Malagos, Calinan, Davao City.
Ayon kay PBGen Caramat Jr, bandang 11:00 ng gabi nang isinagawa ang operasyon sa Crossing Cuevas, Brgy. Cuevas, Trento, Agusan del Sur ng mga tauhan ng Trento Municipal Police Station katuwang ang Community Environment and Natural Resources Office (CENRO).
Tumambad ang nasa humigit-kumulang 32,000 kg ng rattan poles na may kabuuang halaga na Php432,000, kasama ang isang Orange Freight Liner Prime Mover na may Plate No. AAU3174 at isang Blue Freight Liner Prime Mover na may Plate No. MAA2467.
Nahaharap ang dalawang suspek sa kasong paglabag sa Presidential Decree 705 o Revised Forestry Code of the Philippines (Cutting, gathering and/or collecting timber or other products without license. Unlawful occupation or destruction of forest lands).
Ang Caraga PNP ay patuloy na magsasagawa ng Anti-Illegal Logging Operation sa rehiyon upang mapangalagaan ang kalikasan at tinitiyak na papanagutin ang sinumang lalabag.
###
Panulat ni Patrolman Jhunel Cadapan/RPCADU 13
