Nagbigay babala si Philippine National Police (PNP) Chief, Police General Guillermo Lorenzo T Eleazar sa publiko na mag-ingat sa kumakalat na “love scam” sa mga social media platform.
Ito ay matapos maaresto ang dalawang (2) Nigerian na hinihinalang sangkot sa naturang scam.
Nagpanggap ang mga suspek na sina Felix Aondowase at Emmanuel Abia bilang mga Australian upang akitin ang biktimang businesswoman. Humantong ito sa pagpapadala ng mga maseselang larawan ng biktima sa mga suspek hanggang sa kalaunan ay ginamit ito upang i-blackmail ang businesswoman.
Nanghihingi ang mga suspek ng US$8,000 mula sa biktima na ipadadala sa Pilipinong kasabwat nila na nasa Cavite.
“This is not the first time that we encountered and arrested Nigerians using this modus that is why I already ordered our ACG and CIDG to help each other to bust this syndicate. Hindi natin hahayaan na paglaruan lalo na ng mga dayuhan ang wagas na pag-ibig na inaalay ng ating mga kababayan,” ani PGen Eleazar.
“Laganap ang mga tinatawag na ‘love scammers’ sa iba’t-ibang social media platforms kaya I would advise our kababayan to be cautious of persons they connect with online. The anonymity offered by the internet makes it a playground for scammers particularly at this time of pandemic when most of us are spending longer hours online,” dagdag pa ng hepe.
Samantala, sa ikinasang entrapment operation, arestado din ang mga kasabwat ng mga Nigerian na nasa Cavite.
Hinimok naman ni PGen Eleazar ang mga naging biktima ng “love scam” na magsampa ng reklamo upang maaresto at mapanagot ang mga nasa likod ng panlolokong ito.
“Hindi karupukan at kahangalan ang umibig dahil papasok at papasok ito sa puso nating lahat. Ang kailangan lamang ay ang ibayong pag-iingat, lalo na kung malaking pera na ang pinag-uusapan, upang hindi ito mauwi sa lokohan at matinding iyakan,” said PGen Eleazar.
Photo Courtesy: m.facebook.com/SerangoonNPC
#####
Article by Police Corporal Josephine T Blanche
