Sabtang, Batanes – Nagsagawa ng Community Outreach Program ang Batanes PNP sa Sumnanga Elementary School, Brgy. Sumnanga, Sabtang, Batanes noong Hulyo 1, 2022.
Ang aktibidad ay pinangunahan ni PCol Emil T Tumibay, Provincial Director, Batanes PPO, at Provincial Mobile Force Platoon kasama ang PRO 2 Ladies Club sa katauhan ni Mrs Aileen Tumibay.
Ayon kay PCol Tumibay, ito ay kasabay sa pagdiriwang ng kaarawan ng kaniyang kabiyak na si Mrs. Aileen na piniling idaos at magbigay sorpresa sa mga estudyante sa barangay.
Masaya namang tinanggap ng aabot sa 62 estudyante ang mga school supplies, 55 mula Brgy. Sumnanga at 7 naman mula Brgy. Nakanmuan.
Bukod pa riyan ay nagkaroon din ng feeding program para sa mga batang benepisyaryo na labis na nagpasaya at nagpabusog sa kanilang umaga.
Dagdag din ni PCol Tumibay, napili nila ang nasabing barangay dahil isa ito sa mga mahihirap na residente na halos hindi pa naabot ng teknolohiya at mayroon lamang payak na pamumuhay.
Labis naman ang pasasalamat ng mga estudyante sa mga kapulisan sa tulong at pagbibigay inspirasyon at pag-angat ng moralidad lalo na sa kanilang pag-aaral tungo sa minimithi nilang pangarap.
Source: Batanes PPO
###
Panulat ni Police Corporal Jermae Javier
