Quezon City — Arestado ang 129 drug suspects, 121 wanted persons, at 194 illegal gamblers sa isinagawang isang linggong Simultaneous Anti-Criminality and Law Enforcement Operations (SACLEO) sa Quezon City noong ika-23 hanggang ika-29 ng Hunyo 2022.
Ayon kay Quezon City Police District (QCPD) Director, PBGen Remus B Medina, ang nasabing operasyon ay kinabibilangan ng labing-anim na himpilan ng pulisya ng QCPD.
Ayon sa tala ng QCPD, 54 anti-drug operations ang isinagawa na nagresulta sa pagkakahuli ng 129 drug suspects at pagkakasabat ng ilang gramo ng ilegal na droga na nagkakahalaga ng Php2,079,380.
Samatala, 136 na Warrants of Arrest naman ang naihain ng pulisya sa naturang lungsod laban sa mga akusadong nahaharap sa mga kasong kriminal na nagresulta sa pagkakahuli ng 32 Most Wanted Persons at 89 other wanted persons.
Nakapagtala rin ng 57 anti-illegal gambling operations ang QCPD na nagresulta sa pagkakadakip ng 194 katao at pagkakasabat ng perang nagkakahalaga ng Php26,688 na ginamit sa transaksyon habang 164 operasyon ang ikinasa para sa pagpapatupad ng R.A. 10591 o Comprehensive Firearms and Ammunition Regulation Act na naging dahilan ng pagkakaaresto ng apat na katao at pagkakasamsam ng 17 recovered firearms.
“Ang tagumpay natin sa ating kampanya laban sa kriminalidad ay maituturing na isang tagumpay din ng taumbayan. Patuloy nating ipapanalo ang ating operasyon para sa kapayapaan sa ating lungsod,” ani PBGen Medina.
“I commend the QCPD for a job well done and always keep up the good work in maintaining peace and order in your area of responsibility. Let us work hand in hand to apprehend these law offenders and put them behind bars,” pahayag naman ni NCRPO Regional Director, PMGen Felipe Natividad.
Source: Pio Qcpd
###
Panulat ni PSSg Remelin M Gargantos
