Manila, Philippines – Kasabay ng makasaysayang araw na inagurasyon ni President-elect Ferdinand “Bong Bong” R. Marcos, Jr. ngayong araw ng Huwebes, ika-30 ng Hunyo 2022, naglunsad ng Mobile Kusina, Tele-eskwela at Bayanihan Kitchen ang mga miyembro ng National Capital Region Police Office para sa lahat ng sumadya sa Freedom Park sa Liwasang Bonifacio sa lungsod ng Maynila.
Pinangunahan ni NCRPO Regional Director Police Major General Felix R. Natividad kasama si Police Brigadier General Leo M Francisco, District Director, Manila Police District at personal na pinangasiwaan naman ni Police Colonel Romy I. Palgue na siyang Acting Chief ng Regional Community Affairs and Development Division ng rehiyon ang naturang aktibidad.
Maliban pa sa pamimigay ng lugaw, itlog at inumin ang mga miyembro ng NCRPO, naghatid pa ng kaunting kasiyahan at aliw ang NCRPO Band sa paghahatid ng masayang kantahan at sayawan.
Katuwang din ng naturang hanay ng Pulisya ang mga miyembro ng iba’t ibang local force multipliers tulad ng Barangay Peacekeeping Action Team, Triskelion Law Enforcers Group, Women’s Group at iba’t ibang Advocacy Support Groups mula sa karatig lungsod.
Nakikiisa at patuloy na babantayan ng Pambansang Pulisya ng Pilipinas kasangga ang bawat miyembro ng pamayanan ang katiwasayan, kaayusan at katagumpayan ng makasaysayang panunumpa ng bagong Pangulo ng Republika ng Pilipinas.
###
