Tinatayang Php1,200,000 halaga ng marijuana ang nasabat sa tatlong suspek sa buy-bust operation ng Peňaranda PNP nito lamang Martes, Hunyo 28, 2022.
Kinilala ni Police Captain Ricardo M Salomon, Acting Chief of Police ng Peňaranda Municipal Police Station, Nueva Ecija Police Provincial Office, ang mga suspek na sina Eddie Boy Pabia, 21; Aila Cab, 22 at Jeric John Pabia, 21, pawang mga residente ng Brgy. San Josef, Peňaranda, Nueva Ecija.
Ayon kay PCpt Salomon, bandang 5:00 ng hapon naaresto ang mga suspek sa Barangay Poblacion 1, Peňaranda, Nueva Ecija sa pinagsanib na puwersa ng Peňaranda Municipal Police Station, Police Provincial Drug Enforcement Unit, Nueva Ecija Police Provincial Office at Philippine Drug Enforcement Agency.
Narekober mula sa mga suspek ang nasa humigit kumulang 10 kilo ng hinihinalang marijuana leaves na may tinatayang halaga na Php1,200,000 at Php24,000 na marked money.
Nahaharap ang mga suspek sa kasong paglabag sa Section 5 at 11 ng Article III Republic Act 9165 o Comprehensive Dangerous Drugs Act of 2002.
Patuloy pa rin ang ginagawang operasyon ng PNP para tuluyang mahuli ang mga nagbebenta at gumagamit ng ilegal na droga at maging malaya ang ating bansa sa ipinagbabawal na gamot na sumisira sa kinabukasan ng ating mamamayan lalo na sa mga kabataan.
###p
Panulat ni Police Corporal Jeselle V Rivera
