Koronadal, South Cotabato – Arestado ang driver at pahinante ng isang elf truck matapos maaksidente ang kanilang minamanehong sasakyan na naglalaman ng smuggled na sigarilyo na nagkakahalaga ng mahigit 2.7 milyong piso sa kahabaan ng kalsada ng Gensan Drive, Prk. Mabuhay 1, Brgy. Carpenter Hill, Koronadal City, South Cotabato noong Hunyo 14, 2022.
Kinilala ni Police Brigadier General Alexander Tagum, Regional Director ng Police Regional Office 12, ang naarestong suspek na sina Jay-ar Guererro Guialanai, driver at ang kanyang pahinante na si Harris Daod Ayob.
Ayon kay PBGen Tagum, 3,961 na ream na sigarilyo at may tinatayang halaga na Php2,788,500 ang nasamsam ng PNP na nakalagay sa loob ng styrobox coolers na walang kaukulang permit at mga kinakailangang dokumento.
Ayon sa ulat, balak ng mga suspek na dumaan sa Koronadal City, South Cotabato at ihahatid ang item sa Tacurong City, Sultan Kudarat subalit naaksidente ang kanilang sinasakyan dahilan ng kanilang pagkakahuli.
Samantala, ang dalawang suspek ay ligtas naman sa nangyaring aksidente at nasa kustodiya na ng Koronadal City Police Station para sa kaukulang disposisyon.
“Ang PRO 12 ay hindi kailanman magiging ligtas na tirahan at lugar ng pagtatrabaho kung patuloy na gagana ang mga ilegal na aktibidad na ito, kaya naman, bilang mga alagad ng batas, patuloy nating paiigtingin ang ating pagsisikap na wakasan ang mga ilegal na aktibidad sa rehiyon,” ani PBGen Tagum.
###
Panulat ni Patrolman Khnerwin Jay A Medelin
