San Mateo, Isabela – Nirespondehan ng Isabela PNP ang isang nasusunog na bahay sa Brgy. Salinungan East, San Mateo, Isabela noong Hunyo 13, 2022.
Ayon kay Police Lieutenant Colonel Michael A Aydoc, Chief, Provincial Community Affairs and Development Unit (PCADU), Isabela Provincial Police Office, pauwi ang kanilang grupo mula sa Pabahay Inspection sa nabanggit na bayan nang nadaanan nila ang nasusunog na dirty kitchen ni Ginang Gloria Estera.
Habang inaapula ng mga tauhan ng PCADU at San Mateo Police Station ang sunog ay agad nilang itinawag sa Bureau of Fire Protection ang insidente.
Laking pasalamat ni Ginang Estera dahil hindi na lumaki ang sunog, hindi na nakapinsala pa ng ibang tahanan at walang nasugatan.
Pinuri naman ni Police Colonel Julio Go, Acting Provincial Director, Isabela PPO ang mabilis at walang pagdududang aksyon ng PNP sa insidente.
Samantala, pinaalahanan ng PNP ang mga residente na patuloy na mag-ingat, gawin at sundin ang mga fire safety tips upang maiwasan ang mga ganitong pangyayari.
Source: Isabela Police Provincial Office
###
Panulat ni Police Corporal Carla Mae P Canapi
