Camp Delgado, Iloilo City – Tinatayang umabot sa 240 violators ang naaresto ng Police Regional Office 6 sa buong rehiyon sa katatapos lamang na limang buwan na Commission on Elections (COMELEC) gun ban.
Matatandaang nagsimula ang gun ban sa buong bansa kasabay ng pagsisimula ng election period mula Enero 9, 2022 at natapos nito lamang Hunyo 9, 2022.
Ang probinsya ng Negros Occidental ang nakakuha ng pinakamataas na naitalang bilang ng mga naaresto na umabot sa 80, sinundan naman ito ng Iloilo na mayroong 42, Aklan-28, Antique-26, Iloilo City-24, Bacolod City-20, Capiz-12 at Guimaras-8.
Sa mga naaresto, nasa kabuuang 138 assorted firearms ang nakumpiska habang 115 naman ang nakumpiskang sari-saring bladed weapons.
Ang mga suspek ay nasampahan na ng kasong paglabag sa COMELEC Resolution number 10728 o COMELEC gun ban.
Samantala pinuri naman ni Western Visayas top cop, Police Brigadier General Flynn E Dongbo, ang lahat ng mga operating unit ng PRO 6 kasama ang Armed Forces of the Philippines at Philippine Coast Guard sa isang matagumpay na pakikipag-koordinasyon sa pagpapatupad ng COMELEC checkpoints sa buong bahagi ng rehiyon.
Aniya, “Sa ating mga partner agencies, na miyembro ng Regional Joint Security Control Center, maraming salamat, hindi natin ito nakamit kung wala kayo.”
“These arrests are the product of our close coordination, strong collaboration and strict implementation of the COMELEC Resolution through COMELEC checkpoints. The arrest of the violators prevented them from potentially creating unlawful actions due to their possession of deadly weapons and firearms,” dagdag pa niya.
Pinasalamatan din ni PBGen Dongbo ang publiko sa kooperasyon at pakikipagtulungan sa pambansang pulisya na naging susi sa pagkakaroon ng mapayapang halalan sa buong rehiyon.
###
