Zamboanga Sibugay – Tinatayang nasa Php525,000 halaga ng smuggled cigarettes ang nasabat sa isinagawang intel-driven operation ng Zamboanga PNP nito lamang Martes, Hunyo 7, 2022.
Kinilala ni Police Brigadier General Franco Simborio, Regional Director ng Police Regional Office 9, ang apat na suspek na sina Akmad J Isnain, 39; Muhaimen S Muak, 29; Algemar F Abdurahim, 32 at Jerry Ibrahim Anduhol, 31.
Ayon kay PBGen Simborio, bandang 3:20 ng madaling araw nang maaresto ang apat na suspek sa Purok Katipunan, Brgy. Magdaup, Ipil, Zamboanga Sibugay ng mga operatiba ng Ipil Municipal Police Station.
Ayon pa kay PBGen Simborio, nasabat sa mga suspek ang 35 master cases ng smuggled cigarettes na may tinatayang halaga na Php525,000 at isang gray Mitsubishi Adventure na may Plate No. UUU 385 at dalawang cellphone.
Nahaharap ang suspek sa kasong paglabag sa Sec. 1401 (Unlawful Importation or Exportation) ng RA 10863 na kilala rin bilang Customs Modernization and Tariff Act (CMTA).
Samantala, binigyang pugay ni PBGen Simborio ang kanyang mga tauhan. Ito ang nagpapatunay na walang tigil sa pagpapatupad ng batas ang Ipil MPS upang masigurado ang katahimikan at kaayusan sa kanilang nasasakupan.
Source: Ipil Municipal Police Station
###
Panulat ni Police Staff Sergeant Grace Neville Ortiz
