Angeles City – Tinatayang Php340,000 halaga ng shabu ang nakumpiska sa isang High Value Individual sa isinagawang buy-bust operation ng Angeles City PNP nito lamang Biyernes, Hunyo 3, 2022.
Kinilala ni PCol Diosdado C Fabian, Acting City Director ng Angeles City Police Station, ang suspek na si Norainah Mamailao Sarosong, a.k.a “Aina”, 25, residente ng Gumamela Street, Pabalan, Brgy. Manibaug, Porac, Pampanga at tinuturing na isang High Value Individual ng nasabing siyudad.
Ayon kay PCol Fabian, bandang 11:10 ng gabi nang naaresto ang suspek sa McArthur Highway, Brgy. Pulungbulu, Angeles City sa pinagsanib na puwersa ng Station Drug Enforcement Unit (SDEU) at Confidential Intelligence Unit (CIU), Angeles City Police Office (ACPO).
Ayon pa kay PCol Fabian, nakumpiska mula sa suspek ang humigit kumulang 50 gramo ng hinihinalang shabu na may tinatayang halaga na Php340,000; Php500 peso bill marked money; at isang brown leather pouch.
Nahaharap ang suspek sa kasong paglabag sa Section 5 at 11 Article III ng Republic Act 9165 o Comprehensive Dangerous Drugs Act of 2002.
Patuloy pa rin ang ginagawang operasyon ng PNP para tuluyang mahuli ang mga nagbebenta at gumagamit ng ilegal na droga at maging malaya ang ating bansa sa ipinagbabawal na gamot na sumisira sa kinabukasan ng ating mamamayan lalo na sa mga kabataan.
###
Sa panulat ni PCpl Jeselle V Rivera
