Cagayan de Oro City – Arestado ang grupong nagbebenta ng pekeng gold bars sa isinagawang Entrapment Operation ng Cagayan de Oro PNP nito lamang hapon ng Sabado, Hunyo 4, 2022.
Kinilala ni Police Colonel Aaron Mandia, City Director ng Cagayan de Oro City Police Office, ang mga naarestong suspek na sina Rey Naranjo, 58, residente ng Sumpong, Indahag, Cagayan de Oro City; Junalie Licawan, 58, residente ng Ganghaan, Tagoloan, Misamis Oriental; Jerson Liquinan, 28, residente ng Mindagat, Malitbog Bukidnon; at Jimwel Homolay, 33, residente ng Vista Villa, Sumilao, Bukidnon.
Kinilala din ang mga nakatakas na suspek na sina Mark Anthony Martino, 28, residente ng Purok 7, Kisanday, Maramag, Bukidnon; Deney Dwight at Vanessa Nguho Streegan, na pawang residente ng Tagoloan, Misamis Oriental; Eugene Cardona at Marie Cardona, na pawang residente ng Canitoan, Cagayan de Oro City, na kasalukuyang pinaghahanap na ng pulisya.
Ayon kay PCol Mandia, bandang 12:00 ng tanghali naaresto ang mga suspek sa Capistrano Complex, Gusa, Cagayan de Oro City ng mga tauhan ng City Mobile Force Company, City Intelligence Unit at Cagayan de Oro Police Office-Station 3.
Ayon pa kay PCol Mandia, ang naturang mga suspek ay miyembro ng Ganghaan Landless Association o GALA na nagbebenta ng mga gold bars sa silangang parte ng Misamis Oriental, Cagayan de Oro City at Bukidnon.
Ayon sa reklamo ng biktima na nakatira sa Igpit, Opol, Misamis Oriental na napag-alamang naloko siya ng grupo sa nabili niyang pekeng gold bars sa halagang Php500,000.
Sa pangalawang pagkakataon na kumontak ang grupo sa biktima ay timbog na ang mga suspek sa isinagawang entrapment operation.
Nakumpiska sa naturang operasyon ang isang Php1,000 bill; bulto ng bogus na papel at ordinaryong paper money at dalawang pirasong hinihinalang gold bars na nagkakahalaga umano ng Php15M.
Nahaharap sa kasong PD 1689 o Syndicated Estafa ang mga suspek.
Walang ibang hangad ang PNP kung hindi ang mabigyan ng hustisya ang mga kababayan nating naging biktima ng mga tulisan at hinding hindi ito kukunsintihin ang mga ganitong uri ng panloloko.
###
Panulat ni Patrolman Joshua Fajardo / RPCADU 10
