Muntinlupa City — Arestado ang isang construction worker na lumabag sa gun ban habang nagsasagawa ng Simultaneous Anti-Criminality and Law Enforcement Operation (SACLEO) ang Muntinlupa City Police Station nito lamang Martes, Mayo 31, 2022.
Kinilala ni Southern Police District Director, Police Brigadier General Jimili Macaraeg, ang suspek na si Jomari Pancipane y Belarmino alyas “Jomari”, 25, at residente ng Muntinlupa City.
Ayon kay PBGen Macaraeg, dakong 12:15 ng tanghali naaresto si Pancipane sa Bautista Compound, Brgy. Alabang, Muntinlupa City ng mga operatiba ng Alabang Sub-Station ng Muntinlupa City Police Station.
Ayon pa kay PBGen Macaraeg, nang makita ng mga operatiba si Pancipane na may nakasukbit na baril sa bewang, agad nila itong nilapitan upang berepikahin ang kanilang nakita.
Dito na nakumpirma ng mga pulis na isa itong baril at nabigong magpakita ng anumang legal na dokumento ang suspek na nag-udyok sa kanila upang siya’y hulihin.
Nakumpiska sa suspek ang isang .38 revolver na baril at limang bala.
Mahaharap si Pancipane sa kasong paglabag sa Omnibus Election Code (Gun Ban) at Republic Act 10591 (Comprehensive Firearms and Ammunition Regulation Act).
“Panawagan po sa ating mga kababayan na isuko sa otoridad ang mga undocumented firearms na nasa inyong pangangalaga dahil yan po ay pinagbabawal ng batas, ang isang tao ay maaari lamang po na humawak o magmay-ari ng baril kung siya ay dumaan sa tamang proseso bago magmay-ari nito. Ang paghawak ng baril ay may kalakip na responsibilidad, ito ay dapat na itinatago at hindi ipinagmamalaki o ipinagmamayabang”, ani PBGen Macaraeg.
Source: https://m.facebook.com/story.php?story_fbid=322380026738009&id=100068980414302
###
Panulat ni PSSg Remelin M Gargantos
