Binangonan, Rizal – Timbog ang tatlong holdaper sa isang off-duty na pulis na nakatalaga bilang Base Police ng PNP Aviation Security Group (AVSEGROUP) sa Brgy. Habagat, Binangonan, Rizal nito lamang Lunes, Mayo 30, 2022.
Kinilala ni Police Brigadier General Andre Dizon, Director, PNP Aviation Security Group ang katapangan na pinamalas ni Patrolman Rafael Jazmin, residente ng Sitio Pugad, Brgy. Tatala, Binangonan, Rizal.
Ayon Kay PBGen Dizon, bandang 5:50 ng hapon habang bumibili ng pagkain si Pat Jasmin ay bigla siyang nilapitan ng tatlong suspek na may dalang baril at kutsilyo at agad nagdeklara ng holdap.
Dahil dito, hindi na siya nanlaban sa mga suspek, sa halip ay ibinigay ang kanyang pitaka at iba pang personal na gamit, saka mabilis na iniwan ang mga ito sakay ng kanyang motorsiklo.
Nang makauwi si Pat Jasmin ay agad niya kinuha ang kanyang issued firearms at sinundan ang tatlong suspek na tumatakas gamit ang tricycle hanggang sa nakorner at nahuli ni Pat Jazmin kaagapay ang mga barangay officials at dinala sa Binangonan Municipal Police Station.
Nahaharap sa kasong Robbery at RA 10591 o Comprehensive Firearms and Ammunition Regulation Act ang tatlong suspek na sina William Delatina, 24, Jomar Dumangon y Bermudo, 33, at Rosilo Escoso y Delatina, 47.
Binigyang pugay naman ni PBGen Dizon ang katapangan at dedikasyon ni Pat Rafael Jasmin sa pagganap ng sinumpaang tungkulin kahit naka off-duty. Ang ganitong pangyayari ang nagpapatunay na walang pinipiling oras ang mga kawatan kaya dapat maging alerto at mapagmatyag sa lahat ng oras upang mapanatili ang kaayusan at katahimikan ng komunidad.
###
Panulat ni PSSg Jerome Discion/AVSEGROUP
