Santiago City, Isabela – Matagumpay na naiturn-over ng City Mobile Force Company All Women’s ang kanilang pangalawang proyektong pabahay sa Brgy. Luna Santiago City nito lamang Martes, Mayo 24, 2022.
Ito ay pinangunahan ni PLtCol Ednalyn Pamor, Force Commander, CMFC na dinaluhan ni PBGen Romaldo Bayting, Deputy Regional Director for Administration, PRO2; at PCol Reynaldo Dela Cruz, City Director, Santiago City Police Station; kasama ang ilang lokal na opisyal ng Santiago.
Ayon kay PLtCol Pamor, napili nilang maging benepisyaryo ang biyudang si Ginang Yolanda Cauilan na nakikitira lamang sa mga kamag-anak at walang sariling bahay na mayroong isang anak na special child.
Bukod sa pabahay ay nabiyayaan rin si Ginang Cauilan ng mga grocery items na handog ng Santiago CPS.
Lubos ang naging pasasalamat ng nasabing benepisyaryo sa tulong at sorpresang handog ng mga kapulisan.
Dagdag pa ni PLtCol Pamor, ang nasabing pabahay project ay nabuo sa pamamagitan ng tulong at donasyon ng mga tauhan ng City Mobile Force Company (CMFC) ng Santiago City.
Ayon kay PBGen Bayting, ang proyektong pabahay ay tuloy-tuloy na isasagawa ng PNP upang maipakita pa ang mas malalim na ugnayan sa mamamayan.
###
Panulat ni Police Corporal Jermae D Javier
