Cavinti, Laguna – Arestado ang dalawang suspek sa Robbery Hold-up sa isinagawang operasyon ng Cavinti PNP nitong Lunes, Mayo 23, 2022.
Kinilala ni Police Colonel Cecilio Ison Jr., Provincial Director ng Laguna Police Provincial Office, ang dalawang suspek na sina Ronilo Espinosa y Caparuso, 26, tricycle driver, residente ng Brgy. 28 Kawal St., Dagat- Dagatan, Caloocan City at Arnold Ilagan y Reyes, 37, promodizer, residente ng Sitio Putor Kalukob Brgy. Uno, San Juan, Batangas.
Ayon kay PCol Ison, bandang 7:15 ng gabi nahuli ang dalawang suspek sa Checkpoint sa Cavinti, Laguna matapos magsagawa ng Hot Pursuit Operation ang Laguna PNP.
Dagdag pa ni PCol Ison, bandang 6:47 ng gabi nangholdap ang dalawang suspek sa Chito’s Restaurant sa Brgy. San Isidro, Luisiana, Laguna.
Matapos matanggap ang ulat mula sa Luisiana Municipal Police Station ay agad naman inalerto ng Laguna Provincial Police Office ang mga kalapit na istasyon para magsagawa ng hot pursuit operation.
Ayon pa kay PCol Ison, narecover sa mga suspek ang isang caliber 45 na may laman na isang bala, isang piraso na magazine ng cal. .45 loaded ng anim na piraso ng bala, isang piraso na itim na holster, rehistro para sa motorcycle, 1 unit ng motorcycle G2S 200cc na walang plate number, isang kulay asul na Helmet at pera na nagkakahalaga ng Php 5,250.
Nahaharap ang dalawang suspek sa kasong Robbery Hold-up at paglabag sa Republic Act 10591 o Comprehensive Firearms and Ammunition Act in relation to Comelec Gun Ban.
Ang tagumpay ng PNP sa pagsugpo ng mga may pagkakasala sa batas ay bunga ng suporta at pakikipagtulungan ng mamamayan upang mapanatiling ligtas at maayos ang komunidad.
###
Panulat ni Police Executive Master Sergeant Joe Peter Cabugon
