Tinatayang umabot sa Php149,600 halaga ng shabu ang nasamsam sa dalawang suspek na nasakote sa buy-bust operation ng Jose Panganiban PNP nitong Mayo 19, 2022.
Kinilala ni Police Major Elezaldy Caligacion, Chief of Police ng Jose Panganiban Municipal Police Station ang mga suspek na sina Esmeraldo Espena y Loberia, alyas “Eming”, 31, binata, miyembro ng Guttierez Drug Group, kabilang sa Regional Recalibrated Database on illegal drugs at residente ng Purok 1 Brgy. Plaridel, Jose Panganiban, Camarines Norte; at si Gerald Aguiluz y Tapado, alyas “Naldo”, 37, binata, driver, at residente ng Purok 6, Brgy. Motherlode, Jose Panganiban, Camarines Norte.
Ayon kay PMaj Caligacion dakong 8:50 ng gabi naaresto ang mga suspek sa Purok 4, Brgy Bagongbayan, Jose Panganiban, Camarines Norte ng Jose Panganiban MPS.
Ayon pa kay PMaj Caligacion, nakumpiska sa kanila ang isang Php1,000, apat na Php1,000 (boodle Money), isang malaking selyadong plastic na naglalaman ng 5 pirasong pakete na naglalaman ng hinihinalang shabu, at isang coin purse na naglalaman ng tatlong maliliit na pirasong selyadong plastic na pakete ng hinihinalang shabu.
Tinatayang umaabot sa 22 gramo ang kabuuang nakumpiskang ilegal na droga na may katumbas na halagang umaabot sa Php149,600.
Nahaharap ang mga suspek sa kasong paglabag sa Comprehensive Dangerous Drugs Act of 2002 o RA 9165.
Pinuri naman ni Police Colonel Julius Guadamor, Provincial Director ng Camarines Norte Police Provincial Office, ang mga operatiba sa likod ng operasyon. Aniya, magpapatuloy ang Camarines Norte PNP sa sunod-sunod na pagsasagawa at paglatag ng mga anti-illegal drugs operation upang unti-unti nating masupil ang pagkalat ng ilegal na droga sa probinsya bilang proteksyon sa mga mamamayan lalo na sa mga kabataang maaaring mabiktima.
Source: Camarines Norte Police Provincial Office
###
Panulat ni PCpl Shiear “Kye” Velasquez-Ignacio
