Timbog sa Oplan Sita ng Manila Police District (MPD) ang isang 27-anyos na lalaki makaraang mahulihan ng halos tatlong (3) kilo ng marijuana sa Tondo, Manila noong Oktubre 20, 2021.
Dakong alas-dos ng hapon nang magsagawa ng Oplan Sita ang Police Station 2 at nadakip ang suspek na si Judem Alleck Padilla, residente ng Barangay 14, Tondo.
Ayon kay PLtCol Magno Gallora, kasalukuyan ang kanilang Oplan Sita nang mamataan ang isang tricycle na biglang huminto ng ilang metro bago ang checkpoint.
Aligaga at nagmamadaling bumaba at naglakad si Padilla bitbit ang malaking box habang ang tricycle ay umikot na papalayo sa Oplan Sita.
Nang lapitan at siyasatin ng kapulisan ang bitbit ng suspek, tumambad ang limang (5) speaker na naglalaman ng pitong (7) bloke ng pinatuyong dahon at fruiting tops ng marijuana na tinatayang may timbang na 2.950 kilo at nagkakahalaga ng Php354,000.
Sa presensya ng opisyal ng barangay at kinatawan ng media, isinagawa ang pagmamarka at imbentaryo sa mga nasabat na ebidensya.
Kasalukuyang nakakulong ang suspek sa MPD PS2 at nahaharap sa kasong paglabag sa RA 9165 o Comprehensive Dangerous Drugs Act of 2002.
####
Article by Police Corporal Josephine T Blanche
