Bakun, Benguet – Tinatayang Php1,080,000 halaga ng marijuana ang sinira at sinunog ng Benguet PNP sa isinagawang marijuana eradication sa Sitio Mabilig, Kayapa Bakun, Benguet nito lamang Miyerkules, Mayo 18, 2022.
Ayon kay Police Brigadier General Ronald Lee, Regional Director, Police Regional Office Cordillera (PROCOR), naging matagumpay ang operasyon sa pinagsamang operatiba ng Bakun Municipal Police Station at Benguet Police Provincial Office.
Dagdag pa ni PBGen Lee, nadiskubre ng mga operatiba ang 2,400 fully grown marijuana plants na nakatanim sa tinatayang 300sq.m. na lupain na may Standard Drug Price na Php480,000 at limang kilo ng pinatuyong tangkay ng marijuana na may SDP naman na Php600,000 at may kabuuang halaga na Php1,080,000.
Bagamat walang nahuling marijuana cultivator, kaagad namang binunot at sinunog ng mga operatiba ang nadiskubreng marijuana sa mismong lugar ng taniman.
Ang matagumpay na operasyon ay isa lamang sa resulta ng patuloy na pagpupursigi at mas pinaigting na kampanya ng Cordillera PNP kontra ilegal na droga.
###
Panulat ni Patrolman Raffin Jude Suaya
