Santiago, Ilocos Sur – Patay ang isang pasahero habang sugatan ang 21 pasahero sa naganap na banggaan ng isang Isuzu Mini bus at Hi-ace Van sa Brgy. Dan-Ar, Santiago, Ilocos Sur nito lamang Lunes, Mayo 17, 2022.
Kinilala ni Police Lieutenant Godofredo Ribuyaco, Officer-in-Charge ng Santiago Police Station, ang drayber ng Isuzu mini bus na si Joel Escobar y Gagarin, 47, residente ng Brgy. Taleb, Bantay, Ilocos Sur na mayroong 10 sakay na pasahero.
Samantala, kinilala rin ang drayber ng puting Toyota Hi-ace na si Mariano Agusen y Alamani, 55, Barangay Captain ng Brgy. Sabuanan, Sta. Lucia, Ilocos Sur na mayroon namang 10 sakay na pasahero.
Ayon kay PLt Ribuyaco, napag-alamang binabaybay ng Isuzu mini bus ang kahabaan ng Dan-ar National Hi-way patungong hilagang direksyon nang sumulpot ang Toyota Hi-Ace mula sa kabilang direksyon na nag-overtake sa sinusundan nitong motorsiklo sa blind curve ng nasabing hi-way na siyang naging dahilan ng head-on collision ng nasabing mga sasakyan.
Kaagad namang dinala ng mga rumespondeng tauhan ng Santiago MDRRMO, Candon City Fire Station at Santiago PS ang mga biktima sa Candon City General Hospital ngunit idineklarang Dead On Arrival (DOA) ang pasaherong si Brgy. Kagawad Gertrudis Pabillonar ng attending physician.
Kasalukuyan namang nagpapagaling sa nasabing ospital ang parehong drayber at mga pasahero nito habang ang mga nasangkot na sasakyan ay nasa kustodiya na ng Santiago Police Station.
Muling ipinaalala ng Santiago PNP na laging mag-ingat sa pagmamaneho, maging responsable at disiplinado sa kalsada at huwag maging pabayang drayber upang walang taong mapahamak.
Source: Santiago Police Station
###
Panulat ni PSSg Vanessa Natividad/RPCADU1
