Naga City, Camarines Sur – Naglunsad ng Project 4P’s ni Mario ang Naga City PNP sa Sitio Balatongan, Barangay Concepcion Grande, Naga City, Camarines Sur nitong Huwebes, Mayo 12, 2022.
Pinangunahan ni Police Brigadier General Mario Reyes, Regional Director ng Police Regional Office 5 ang isinagawang Ceremonial Tree Planting Activity at Blessing and Turn-over Ceremony of Communal Comfort Room na may temang “Paso at Pipti para sa Palikuran sa Pamayanan” katuwang ang Philippine Army, Sangguniang Barangay ng Concepcion Grande, mga kinatawan ng iba’t ibang ahensya ng gobyerno, mga pribadong sector at mga Advocacy Support Group.
Apat na Comfort Rooms (C.R.) o palikuran ang naipatayo at pormal ng ibinahagi sa mga residente ng nasabing lugar na kung saan mahigit 90 na pamilya ang makikinabang mula rito.
Pinaayos din ang poso upang mapagkuhanan ng malinis na tubig na gagamitin ng mga residente sa lugar. Ito’y naisakatuparan mula sa Php50 (Pipti) na ambagan ng mga miyembro ng Naga CMFC at parte ng pondo mula sa naibentang Paso Products at sa mga donasyon na materyales ng stakeholders.
Umabot sa 80 pamilya naman ang nabigyan ng food packs ng nasabing programa. Nagkaroon din ng pa-Raffle si PBGen Reyes sa mga residente na kung saan mahigit 20 indibidwal ang nabigyan ng kaunting halaga mula sa kabutihang loob ng ating butihing Regional Director.
Dahil sa tagumpay ng proyekto, nangako ang pribadong sektor na magpapatayo ng tatlo pang set ng palikuran sa nasabing lugar.
Magbibigay rin ng libreng Livelihood Training/Seminar ang TESDA tulad ng Basic Carpentry, Welding at Masonry sa mga kalalakihan kung saan ang magiging proyekto/output ng kanilang training ay ang pagtatrabaho ng dagdag palikuran na itatayo sa lugar.
Bibigyan rin ng livelihood training partikular ang mga kababaihan katulad ng Cake Making, Dress Making at iba pang mapagkakakitaan.
###
Panulat ni Patrolman Rodel Grecia
